#IjodiyErkinlik #KinoTaraqqiyoti
Davlatimiz rahbari tomonidan madaniyat va san’at sohasi vakillari bilan o‘tkazilgan uchrashuvda kinematografiya tizimini tubdan isloh qilishga qaratilgan muhim qarorlar e’lon qilindi. Xususan, Respublika kinematografiya komissiyasi, Milliy va Badiiy kengashlar faoliyatining tugatilishi hamda ularning o‘rniga soha mutaxassislaridan iborat professional ekspert guruhlarining tashkil etilishi o‘zbek kinosi tarixida yangi davrni boshlab beradigan muhim qadamdir.
Prezidentimiz ta’kidlaganidek, bugungi zamon tezkorlik, ochiqlik, raqobat va natijadorlikni talab qilmoqda. Avvalgi boshqaruv mexanizmlari esa ayrim hollarda ijodiy jarayonlarning sekinlashishiga va yosh kinoijodkor tashabbuslarining o‘z vaqtida qo‘llab-quvvatlanmasligiga sabab bo‘lgan edi. Endilikda esa qaror qabul qilish jarayoniga bevosita amaliy tajribaga ega mutaxassislar jalb etilishi soha rivoji uchun yangi imkoniyatlar yaratadi.
Qabul qilinayotgan qarorlar natijasida ijodiy erkinlik yanada kengayadi, iste’dodli rejissyorlar, ssenaristlar, operatorlar va prodyuserlarning yangi loyihalariga keng yo‘l ochiladi. Eng muhimi, sohada sifat, professional yondashuv va shaffoflik mezonlari ustuvor ahamiyat kasb etadi.
Ushbu tashabbuslarni men Yangi O‘zbekiston madaniy siyosatidagi navbatdagi tarixiy qadam sifatida baholayman. Bu islohotlar milliy kinematografiyamizni xalqaro maydonda raqobatbardosh darajaga olib chiqish, yangi avlod kinoijodkorlarini qo‘llab-quvvatlash va o‘zbek kinosining yangi oltin davrini yaratishga xizmat qiladi.
Ishonchim komilki, ushbu o‘zgarishlar natijasida O‘zbekiston kinosi dunyo ekranlarida yanada munosib o‘rin egallaydi va milliy madaniyatimizning kuchli targ‘ibotchisiga aylanadi.
Xasanov Hamidulla Babayevich
O‘zbekiston Respublikasida xizmat ko‘rsatgan madaniyat xodimi, S.A.Gerasimov nomidagi BDKU Toshkent filiali dotsenti
Youtube sahifamizga havola: Youtube | Telegram sahifamizga havola: ВГИК Ташкент | Facebook sahifamizga havola: Facebook